سەرۆکوەزیرانی عێراق لەبارەی دابەشکردنی موچەی فەرمانبەرانی عێراقەوە دڵنیایی دەدات و ڕایدەگەیەنێت، چاکسازیان کردووە و کۆمەڵگەی نێودەوڵەتیش لەگەڵ چاکسازییەکانیاندایە.
مستەفا کازمی، سەرۆکوەزیرانی عێراق لە کۆبوونەوەیەکدا لەگەڵ کۆمەڵێک لە شیکەرەوانی سیاسی و مامۆستای زانکۆ ئێوارەی ئەمڕۆ دووی کانوونی دووەم ڕایگەیاند، ” حکومەتی عێراق لە شەش مانگی ڕابردوودا متمانەی گەڕاندووەتەوە بۆ هێزە ئەمنییەکان و ئێستا پەیوەندی نێوان خەڵک و ئەو هێزانە زۆر باشترە، سوپاش لە هەموو کاتێک زیاتر ئامادەیە بۆ پاراستنی گەلەکەى لەدژی هەموو مەترسییەک.”
لەبارەی دۆخی ئابوری عێراقەوە کازمی ڕایگەیاند، ” ناهێڵین عێراق مایەپوچ بێت و دەبێت ئەمساڵ ساڵی ئاشکرابوونی ڕاستی گەورە بێت سەبارەت بە گەندەڵی.”
سەرۆکوەزیرانی عێراق ڕاشیگەیاند، ” بەشێک لە وڵاتانی جیهان ئامادەی پشتیوانی عێراقن و لەم ساڵانەی ڕابردوودا کەرتەکانی پیشەسازی، کشتوکاڵ، پەروەردە و تەندروستی گەشەیان پێ نەدراوە و و وێران کراون.”
کازمی لە قسەکانیدا وتیشی، ” هەموو دراوسێکانمان هەوڵی پشتگیریکردنی هەستانەوەى عێراق دەدەن، هەمووان تێگەیشتوون کە هاوسەنگییە هەرێمی و نێودەوڵەتییەکان پێویستی بە عێراقێکی بەهێز هەیە، بۆیە دوای شەش مانگ کارکردن ئێستا عێراق پەیوەندی بەهێزی لەگەڵ زۆرینەی وڵاتانی جیهاندا هەیە”.
بە وتەی سەرۆکوەزیرانی عێراق، “گەندەڵی هەموو شتێکی گرتووەتەوە و سوتاندوویەتی، بۆیە قۆناغێکی قورسە لە سەردەمی کۆرۆنادا کارکردن، لەگەڵ بوونی ئەو گەندەڵییەی لە وڵاتدا هەیە”.
