دوای ئەوەی کۆمسیۆنی باڵای سەربەخۆی هەڵبژاردنەکانی عێراق دەرگای بانگەشەی داخست بڕیارە سبەینێ بە دەنگدانی تایبەت، هەڵبژاردنی ئەنجومەنی پارێزگاکانی عێراق دەستپێبکات.
بڕیارە سبەینێ کە دەکاتە 16ی کانوونی یەکەمی 2023 لە کاتژمێر 7:00ی بەیانی، دەنگدانی تایبەت بۆ هەڵبژاردنی ئەنجومەنی پارێزگاکانی عێراق دەستپێبکات و تاوەکو کاتژمێر 6:00ی ئێوارە بەردەوام بێت، هاوکات بەپێی ئامارەکانی کۆمسیۆنیش ملیۆنێک و دوو هەزار و 393 دەنگدەری تایبەت و 48 هەزار و 260 راگوێزراو بەشداری دەکەن.
لەلایەکیتریشەوە رۆژی دوو شەممە کە دەکاتە 18ی کانوونی یەکەمی 2023 لە کاتژمێر 7:00ی بەیانیەوە دەنگدانی گشتی لە 15 پارێزگای عێراق دەستپێدەکات و تاوەکو کاتژمێر 6:00ی ئێوارە بەردەوام دەبێت.
بەپێی ئامارەکانی کۆمسیۆنی باڵای سەربەخۆی هەڵبژاردنەکانی عێراق، 15 ملیۆن و 108 هەزار و 135 دەنگدەری گشتی بەشداری هەڵبژاردن دەکەن، هەروەها نزیکەی هەشت هەزار ناوەند و 39 هەزار وێستگەی دەنگدان بۆ دەنگدەران ئامادەکراون.
