قوباد تاڵەبانی جێگری سەرۆکی ئەنجومەنی وەزیران رایگەیاند، هەموو هەوڵێکمان بۆ ئەوەیە کێشەی بەشە بودجە و مووچەی فەرمانبەرانی هەرێم بە یەکجاری چارەسەربکەین و ناکرێت ئەم کێشەیە لە ساڵی داهاتووشدا بەردەوام بێت.
ئەمڕۆ پێنجشەممە قوباد تاڵەبانی جێگری سەرۆکوەزیران لەگەڵ ستیڤن چارڵس هیچن، باڵیۆزی بەریتانیا لە عێراق کۆبووەوە و تاوتوێی دۆخی سیاسی و ئەمنی عێراق و پەیوەندییەکانی نێوان هەرێم و بەغداد کرا.
لە کۆبوونەوەکەدا قوباد تاڵەبانی رایگەیاند،ئەرکی هەموو لایەنە عێراقییەکانە هەوڵبدەن بۆ پاراستنی سەقامگیری سیاسی و ئەمنی عێراق، هاوکات لەگەڵ ئەوەشدا بۆ گەڕاندنەوەی متمانە، پێویستە هەر لایەنێک لەلای خۆیەوە نیازپاکی نیشان بدات، تەنها بە پاراستنی سەقامگیری و گەڕاندنەوەی متمانە دەتوانرێت کێشە سیاسییەکان و لەناویشیاندا کێشەکانی نێوان هەرێم و بەغدا بەشێوەیەکی بنەڕەتی چارەسەر بکرێن.
باسیلەوەشکرد، لە ماوەی رابردوودا کەشێکی ئەرێنی هاتووەتە ئاراوە بۆ چارەسەرکردنی کێشە ناوخۆییەکان و هەنگاوی باش نراون بە ئاڕاستەی یەکگرتوویی و یەکڕیزی نێوان لایەنە کوردستانییەکان، گەشبینم بە بەردەوامیی ئەم کەشە ئەرێنییە بەشێکی بەرچاوی کێشەکان چارەسەر بکرێن و بەمەش پێگەی هەرێمی کوردستان لە عێراقدا بەهێزتر ببێت.
هاوکات ئاماژەی بە گەڕانەوەی وەزیری پێشمەرگە بۆ سەر ئەرکەکەی کرد و رایگەیاند، بە گەڕانەوەی وەزیر پرۆسەی ریفۆرم لە وەزارەتی پێشمەرگە خێراتر و باشتر جێبەجێ دەکرێت.
