بەڕێوەبەرایەتیی گشتیی كەشناسی و بومەلەرزەزانیی هەرێم رایدەگەیەنێت، ئەمشەو ئاسمانی هەرێمی كوردستان هەور و نیمچەهەور دەبێت لەگەڵ بوونی تەمێكی سووك بۆ مامناوەند لە ناوچەی جیا جیا تا بەرەبەیان و سبەینێش لە هەندێك ناوچە لێزمە باران دەبارێت.
بەپێی راگەیەندراوێكی بەڕێوەبەرایەتیی گشتیی كەشناسی و بوومەلەرزەزانیی هەرێمی كوردستان كە وێنەیەكی دەست تۆڕی میدیایی ئێستا كەوتووە و تێیدا هاتووە، ئەمشەو ئاسمانی هەرێم هەور و نیمچەهەور دەبێت لەگەڵ بوونی تەمێكی سووك بۆ مامناوەند لە ناوچەی جیا جیا تاوەكو بەرەبەیان.
هەر لە راگەیەندراوەكەدا هاتووە، سبەی بەیانی پێشبینیدەكرێت ئاسمان لە باكوور و رۆژهەڵاتی باكووری هەرێمی كوردستان هەوری تەواو بێت لەگەڵ دەستپێكردنی نمەباران لە ناوچە شاخاوییەكان و دواتر رێژەی بارانبارین لە پارێزگای دهۆك و ناوچە شاخاوییەكانی زیاد دەكات و ئەگەری لێزمە باران هەیە لەگەڵ بارینی نمەباران لە ناوەڕاستی هەرێم تا ئێوارە و دواتر كاریگەریەكەی بە لاوازی لە ناوچەكانی رۆژهەڵاتی هەرێمی كوردستان دەمێنێتەوە.
بڕی بارانی 12 كاتژمێری رابردووی هەندێك لە ناوچەكانی هەرێمی كوردستان بەم شێوەیە بووە:
سلێمانی دڵۆپ دڵۆپ
چەمچەماڵ دڵۆپ دڵۆپ
بازیان 1.6 ملم
دەربەندیخان 0.4 ملم
دوكان 1.0 ملم
هەڵشۆ 0.8 ملم
هەڵەبجە 0.8 ملم
كەركوك 3.6 ملم
