بەرپرسی فەرمانگەی پەیوەندییەكانی دەرەوەی هەرێمی كوردستان رایدەگەیەنێت، هەر یەكە لە ئەمریكا و فەرەنسا و بەریتانیا هەوڵی چارەسەركردنی كێشەكانی نێوان هەرێم و بەغداد و ئەنكەرە دەدەن بۆ ئەوەی دەست بە هەناردەكردنەوەی نەوتی هەرێمی كوردستان بكرێتەوە.
سەفین دزەیی بەرپرسی فەرمانگەی پەیوەندییەكانی دەرەوەی هەرێمی كوردستان لە لێدوانێكی رۆژنامەوانیدا رایگەیاند، دەبێت هەوڵبدەین سەرمایەگوزاریی بیانی بۆ هەرێمی كوردستان رابكێشین و وتیشی، “هەندێك گرفت لەسەر هەناردەكردنی نەوت هەیە، بەڵام هەرێمی كوردستان خۆی لەسەر نەخشەی جیهانی كردووەتەوە و ئێستاش هەوڵێكی زۆر هەیە كە دووبارە هەناردەی نەوتی هەرێم دەستپێبكاتەوە”.
ئاشكراشیكرد، لە ئێستا هەریەك لە ئەمریكا و بەریتانیا و فەرەنسا هەوڵدەدەن هەناردەی نەوتی هەرێمی كوردستان دەستپێبكاتەوە ئەو كێشانەی لە نێوان هەرێم، بەغداد و ئەنكەرە هەیە چارەسەربكرێن.
