وەزارەتی كشتوكاڵ دەنگۆیەك لەبارەی گرتنەوەی ئاوی هەرێم لە ناوچەكانی باشووری عێراق رەتدەكاتەوە و دەڵێت، ئەو پرسە بە دەستوور رێكخراوە.
وەزارەتی كشتوكاڵ و سەرچاوەكانی ئاوی هەرێم روونكردنەوەیەكی بڵاوكردەوە و رایگەیاند، هیچ جۆرە ناکۆکییەک لەسەر ستراتیژی بەڕێوەبردنی ئاو نیە و، ئەو بابەتانەی لە سۆشیاڵ میدیادا بڵاوبوونەتەوە هیچ بنەمایەکی دروستیان نیە.
دەشڵێت، “هیچ کۆبوونەوەیەک هەڵنەوەشاوەتەوە، لەسەر بنەمای ناکۆکیی نێوان هەردوو وەزارەتی کشتوکاڵ و سەرچاوەکانی ئاوی هەرێمی کوردستان و وەزارەتی سەرچاوە ئاوییەکانی عێراق، بە پێچەوانەوە پەیوەندییەکانمان لە ئاستێکی زۆر باشدان”.
لەكاتێكی پێشتری ئەمڕۆدا سایتی پارتی لە زاری نەبەز رەفعەت، راوێژكاری وەزارەتی كشتوكاڵی هەرێم رایگەیاند، هەرێمی كوردستان بابەتی بەردانەوەی ئاوی بەرامبەر بە عێراق بەكارهێناوە وەك فشار و، ئاومان كردوەتە مەرج، ئەگەر بەغداد پابەندنەبێت بە رێككەوتن، ئێمەیش ئاو دەگرینەوە لەسەر ناوچەكانی ناوەڕاست و باشووری عێراق.
وتیشی، “ئەگەر عێراق رێگەنەدات بەرهەمی جوتیارانی كوردستان بچێتە بازاڕەكانی ناوەڕاست و باشووری عێراق و رێگری بكرێت، ئێمەیش ئاوی پێویست بۆ ئەو ناوچانە بەرنادەینەوە، ئێستا رەوشەكە باشە و رێگری ئەوتۆ ناكەن”.
هاوكات بەشێك لە میدیاكان بڵاویانكردەوە، له به‌رامبه‌ر نه‌ناردنى پشكى هه‌رێمى كوردستان و رێگریكردن له چوونى به‌رهه‌مى كشتوكاڵى بۆ ناوچه‌كانى باشوور و ناوه‌ڕاستى عێراق، له هه‌فته‌ى رابردوودا ئه‌نجومه‌نى وه‌زیرانى هه‌رێم كۆبوونه‌وه‌یه‌كى له‌گه‌ڵ وه‌زیرى سه‌رچاوه ئاوییه‌كانى عێراق ره‌تكرده‌وه.
وەزارەتی كشتوكاڵ لە روونكردنەوەكەیدا دووپاتیشیدەكاتەوە، لەپێناو پارێزگاری لە ئاسایشی ئاوی عێراق و هەرێم، بەیەکەوە کاردەکەین بە ئامانجی رووبەرووبونەوەی ئاستەنگ و گۆڕانکارییەکانی کەشوهەوا و کەمکردنەوەی کاریگەرییەکانی دیاردەی کەمبونەوەی ئاو بۆ سەر کەرتی کشتوکاڵ و هاوڵاتییان بەگشتی.
ئەوەش دەخاتەڕوو، دۆسیەی ئاو بەپێی دەستوور رێکخراوە لە نێوان حکومەتی هەرێمی کوردستان و حکومەتی فیدراڵ و، بۆ ئەم مەبەستەش هەردوو وەزارەت پەیوەندییە هاوبەشەکانیان رێکخستووە.
