ئەندامێكی لیژنەی نەوت و وزە لە خولی پێنجەمی پەرلەمانی كوردستان رایدەگەیەنێت، بەهۆی خراپیی ئیدارەدانی دۆسیەی نەوتی هەرێمی كوردستان لە ماوەی رابردوودا كێشە بۆ هەناردەی نەوتی هەرێم دروستبووە و توركیاش دەیەوێت ئەو قەرەبووە 1.5ملیارییەی دادگای پاریس بەسەریدا سەپاندوویەتی هەرێم بیداتەوە بە عێراق سەرجەم ئەو كێشانەش دواجار مووچەخۆران لێی زەرەرمەنددەبن.
د. شێركۆ جەودەت ئەندامی لیژنەی نەوت و وزە لە خولی پێنجەمی پەرلەمانی كوردستان لە لێدوانێكدا بە تۆڕی میدیایی ئێستای راگەیاند، هەرێمی كوردستان و مووچەخۆران باجی خراپیی ئیدارەدانی دۆسیەی نەوت و گاز دەدەن و لە ئێستادا چەندین بیانوو بە هەرێم دەگیرێت و لایەنی دەرەكیش هەبوو پێشتر كە دەوترا پشتیوانی هەرێمی كوردستانە، بەڵام لەم دۆخەدا دەركەوت كە پشتیان لە هەرێم كردووە.
بە بڕوای شێركۆ جەودەت هەناردەی نەوتی هەرێم وا بە زوویی دەستپێناكاتەوە و چەند كێشەی گەورە هەن پێویستە چارەسەربكرێن و وەك ئەوەی بڵاوكراوەتەوە توركیاش دەیەوێت قەرەبووەكەی بە حكومەتی هەرێم بداتەوە كە دواجار هەرێمی كوردستان و مووچەخۆران زەرەرمەنددەبن.
لە دوو رۆژی رابردوودا ئاژانسی بلۆمبێرگ لە زاری دوو بەرپرسی توركیاوە بڵاویكردەوە، توركیا دەیەوێت هەرێمی كوردستان بڕی یەك ملیار و 500 ملیۆن دۆلارەكە وەك قەرەبوو بداتەوە بە عێراق، بەوپێیەی هەرێمی كوردستان لە هەناردەی نەوتدا سوودمەندی پلەیەك بووە.
