دەزگای ئاسایشی هەرێم دەستگیركردنی تۆمەتباری رووداوەكەی ناحیەی شۆڕشی قەزای چەمچەماڵ رادەگەیەنێت.
بەپێی راگەیەندراوێكی دەزگای ئاسایشی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، بەڕێوەبەرایەتیی ئاسایشی رۆژئاوای سلێمانی، تۆمەتباری رووداوی كوشتنی كەسێك و برینداركردنی پێنج كەسی دیكەی ناحیەی شۆڕشی دەستگیركرد.
لە راگەیەندراوەكەدا هاتووە، هێزەكانی ئاسایش دوای لێكۆڵینەوەی ورد و دەستنیشانكردنی شوێنی تۆمەتبار، بەبڕیاری دادوەری لێكۆڵینەوەی ئاسایش، لە هەمان شەوی رووداوەكەدا توانیان لە ناحیەی سەنگاو تۆمەتباری تەقەكەر دەستگیربكەن و دەستبگرن بەسەر ئەو چەكەی كە تاوانەكەی پێ ئەنجامداوە.
هەر لە راگەیەندراوەكەدا هاتووە، دوای ئەوەی ئێوارەی7ی 8ی 2023 لە ناحیەی شۆڕشی قەزای چەمچەماڵ كێشە و شەڕ لە نێوان دوو بنەماڵە دروستبوو بووە هۆی گیانلەدەستدانی كەسێك و برینداربوونی پێنج كەسی دیكە.
ئاماژە بۆ ئەوەش كراوە، لە ئێستادا تۆمەتبار بە بڕیاری دادوەری لێكۆڵینەوەی ئاسایش بە ماددەی 406 لە یاسای سزادان ڕاگیراوە.
