کونسوڵخانەی گشتیی ئەمریکا لە هەولێر پەیامی پشتیوانی لە رێککەوتنی یەکێتیی نیشتمانیی کوردستان و پارتی دیموکراتی کوردستانی لەبارەی ئەنجامدانی هەڵبژاردنەوە بڵاوکردەوە.
کونسوڵخانەی ئەمریکا لە پەیامەکەیدا دەڵێت، “کونسوڵخانەی گشتی ئەمریکا لە هەولێر پێشوازی لە رێککەوتنی یەکێتی و پارتی دەکات لەسەر ئەنجامدانی هەڵبژاردنی پەرلەمانی کوردستان و پشتگیری بۆ یەکگرتن و چاکسازی پێشمەرگە”.
ئاماژە بەوەشکراوە، “ئێمە بەوپەڕی خۆشحاڵییەوە چاوەڕێی بینینی پێشکەوتن دەکەین لە کاتێکدا هەردوولا کۆدەبنەوە و دانوستان لەسەر ئەو پرسانە دەکەن کە ماونەتەوە بۆ سوودگەیاندن بە خەڵکی کوردستانی عێراق”.
لە کۆبوونەوەی دوێنێی شاندی پارتی دیموکراتی کوردستان و یەکێتیی نیشتمانیی کوردستان لە دەباشان رێککەوتن لەبارەی چەند خاڵێکەوە کرا کە بریتیین لە:
1- هەردوولا پشتیوانی لە ئەنجامدانی هەڵبژاردنی پەرلەمانی کوردستان دەکەین لەو کاتەی لەلایەن سەرۆکی هەرێم دیاریدەکرێت لە دوای راوێژ لەگەڵ لایەنە سیاسییەکانی هەرێمی کوردستان.
2- بۆ زیاتر خزمەتکردنی خەڵکی کوردستان لە هەموو روویەکەوە کێشە و جیاوازییە بچووکەکان بەلاوە بخرێن و روو لە پێکەوە چارەسەرکردنی کێشەکان بکەین.
3- بڕیارماندا پرۆسەی رێکخستنەوەی هێزەکانی پێشمەرگە بەردەوام بێت.
4- هەردوولا بڕیارماندا پشتیوانی لە رێککەوتنەکانی کابینەی نۆیەمی حکومەتی هەرێمی کوردستان بکەین.
5- لە پێناو زیاتر لێکنزیکبوونەوە و بەرەنگاربوونەوەی ئاڵەنگاری و سەرکەوتن بەسەر کۆسپەکاندا بڕیارماندا بە رۆحیەتی کوردستانیانە و نیشتمانپەروەرانە بەردەوامی بدەین بە کۆبوونەوە دوو قۆڵییەکان و هەماهەنگیمان لەگەڵ سەرجەم لایەنەکان.
