بەڕێوەبەری نەخۆشخانەی د. جەمالی منداڵان بڕیاریدا ئەو منداڵانەی تووشبووی ئۆتیزم یان ئیفلیجی مێشکی توند بوون لە کاتی نەخۆشکەوتنیان ژووری تایبەتیان بۆ تەرخاندەکرێت.
بەپێی نووسراوێکی نەخۆشخانەی د. جەمال ئەحمەد رەشیدی منداڵان کە واژووی د. پشدەر عەبدوڵا بەڕێوەبەری نەخۆشخانەکەی لەسەرە بڕیاردراوە ئەو منداڵانەی نەخۆشی ئۆتیزم یان ئیفلیجی توندی مێشکیان هەیە، لە کاتی مانەوەیان لە نەخۆشخانەکە ژووری تایبەتیان بۆ دابین دەکرێت، بەو مەرجەی لەو کاتەدا ژوورەکان نەگیرابن و لۆدی زۆر لەسەر نەخۆشخانەکە نەبێت.
هەر بەپێی نووسراوەکە، رێگەدەدرێت نەخۆش دوو هاوەڵی مێی لەگەڵ بێت ئەگەر ژووری تایبەتیش هەبوو رێگە بە دایک و باوک دەدرێت هاوەڵی بن لەبەر پێویستی زۆریان بە چاودێری و خزمەت.
