بڕیارە سبەی محەمەد شیاع سودانی، سەرۆك وەزیرانی عیراق سەردانی هەرێمی كوردستان بکات و سەرچاوەیەکی ئاگادار لە بەغداد کە نەیویستووە ناوی ئاشکرا بکرێت، ئاماژەی بەوەکردووە بڕیارە سەردانی سلێمانی بکات و لەگەڵ بافڵ جەلال تاڵەبانی، سەرۆکی یەکێتیی نیشتمانیی کوردستان کۆببێتەوە.
سەرچاوەکە ئەوەشی خستووەتەڕوو، پرسی مووچە و بودجە، سەرژمیری گشتی، هەناردەکردنی نەوت و کێشە چارەسەرنەکراوەکانی دیکەی نێوان هەولێر و بەغداد لە کارنامەی گفتوگوکانی سەردانەکەیدا دەبن.
ئەمەش لە دوای ئەوە دێت، رۆژی 5ی تشرینی دووەمی ئەمساڵ، ئەنجومەنی وەزیرانی عیراق بەسەرۆكایەتی محەمەد شیاع سودانی، سەرۆكوەزیرانی عیراق كۆبووە و چەند پێشنیازە یاسایەك پەسەند كران كەگرنگترینیان پێشنیازی هەمواركردنەوەی ماددەی دووە لە یاسای بودجە كە بریتییە لەپابەندبوونی وەزارەتی دارایی عیراق بەقەرەبووكردنەوەی حكوومەتی هەرێمی كوردستان لەخەرجییە “سیادییەكان” بۆ تێچووی بەرهەمهێنان و گواستنەوەی نەوت، بەرانبەر ئەو نەوتەی كە لەلایەن هەرێمەوە بەرهەم دێت و لەلایەن كۆمپانیای بەبازاڕكردنی نیشتمانی “سۆمۆ” و وەزارەتی نەوتی فیدراڵەوە وەردەگیرێت”.
