بەڕێوەبەرایەتیی هاتوچۆی گەرمیان رایدەگەیەنێت، لە دوو رووداوی هاتوچۆدا پێنج كەس برینداربوون.
بەپێی راگەیەندراوێكی بەڕێوەبەرایەتیی هاتوچۆی گەرمیان كە وێنەیەكی دەست تۆڕی میدیایی ئێستا كەوتووە و تێیدا هاتووە، پاشنیوەڕۆی ئەمڕۆ یەكشەممە لە دوو رووداوی هاتوچۆدا پێنج كەس برینداربوون كە رووداوی یەكەم لەناو شاری كەلار و نزیك قەڵای شێروانە بووە و ئۆتۆمبێلێكی جۆری جێب چیرۆكی بەئاراستەی گردەگۆزینە رۆیشتووە كۆنترۆڵی لەدەستداوە و كەوتووەتە نێوان هەردوو شەقامەكە و زیانی بە ستوونێكی رووناكی گەیاندووە و شۆفێر و سەرنشێنكی برینداربوون.
هەر لە راگەیەندراوەكەدا هاتووە، رووداوی دووەم پێكدادانی دوو ماتۆڕسكیل بوو لە خانەقین بە ئاراستەی گوندی ساڵەح ئاغا هاتوون و بەهۆیەوە سێ كەس برینداربوون یەكێكیان منداڵێكی تەمەن حەوت ساڵانە و بریندارەكان بەمەبەستی وەرگرتنی چارەسەر گەیەنرانە نەخۆشخانەی فریاكەوتنی شەهید هەژار لە كەلار و لەلایەن تیمی هاتوچۆوە لێكۆڵینەوە لە ڕووداوەكە دەستیپێكردووە.
