لە چیاكانی سنووری گوندێكی سەر بە قەزای چوارتا ئاگركەوتنەوە سەدان دۆنم دارستان و پاوانی سووتاند.
لە چیاکانی سنووری گوندی (بێورێ)ی سەر بە قەزای چوارتا ئاگرێك کەوتەوە، بەڕێوەبەرایەتیی پۆلیسی دارستان و ژینگەی سلێمانی دەڵێت، بووە هۆی سووتانی نزیکەی 300 دۆنم دارستان، پوش و پاوان.
دەشڵێت، بە هەوڵی مەفرەزەیەك لە کارمەندانی بەشی پۆلیسی دارستانی شارباژێڕ و بەرگریی شارستانیی قەزای چوارتا و دانیشتووانی ناوچەکە ئاگرەکە کۆنتڕۆڵکرا.
بەڕێوەبەرایەتییەكە ئەوەشی خستەڕوو، دوێنێش لە سنووری گوندی (کانی سارد)ی ناحیەی سیتەك ئاگرێکی دیکە کەوتەوە، بە ماوەیەکی کەم مەفرەزەیەكی بنکەی پۆلیسی دارستانی سیتەك گەیشتنە شوێنی ئاگرەکە و بە هاوکاری ئاگرکوژێنەوەی سیتەك و هاوڵاتیان توانییان کۆنتڕۆڵی بکەن.
بەهۆی ئەو رووداوەشەوە پێنج دۆنم پوش و پاوان و باخێك سووتان.
وەك ئەوەی پۆلیسی دارستان ئاماژەی پێداوە، دوای لێکۆڵینەوە و بەدواداچوون سێ هاوڵاتی دەستگیرکران کە گومانیان لێدەکرا هۆکاری کەوتنەوەی ئاگرەکەبن.
