یانەی ڕیاڵ مەدریدی ئیسپانی ئەمڕۆ، سێشەممە بە فەرمی گەڕانەوەی ئیکەر کاسیاسی گۆڵپارێزی ئەفسانەیی ئاشکراکرد.
بەپێی ڕاگەیانراوێک کە لەلایەن یانەی شاهانەوە بڵاوکراوەتەوە، کاسیاس لە دوای وازهێنان و ماوەیەک حەوانەوە لەگەڵ خێزانەکەی، لەمەودوا وەک جێگری بەرێوبەری دامەزراوەی ڕیاڵ مەدرید دەستبەکاردەبێت “ڕیاڵ مەدرید فاوندەیشن”، کە ئەوەش یەکێکە لە بەرزترین پلە کارگێڕییەکان لە یانەی ناوبراو.
کاسیاس لە ژیانی وەرزشییدا لە ماوەی 25 ساڵدا 19 نازناوی بەدرێسی لۆس بلانکۆسەوە بەدەستهێناوە، سێ جامی ئەوروپی، سێ جامی جیهانی یانەکان، دوو جامی سوپەری ئەوروپا، پێنج نازناوی لالیگا، دوو جامی شا، چوار جامی سوپەری ئیسپانیا، لە پۆرتوگالیش بە درێسی یانەی پۆرتۆ دووجار نازناوی خولی ناوخۆ، جامی پۆرتوگال و جامی سوپەری پۆرتوگالی چنیوەتەوە.
لەگەڵ هەڵبژاردەی ئیسپانیا 167 یاری نێودەوڵەتی کردووە، جامی جیهانی و دوو جامی نەتەوەکانی ئەوروپا و جامی جیهانی خوار تەمەن 20 ساڵی بەدەستهێناوە.
Comunicado Oficial: Iker Casillas#RealMadrid
— Real Madrid C.F. (@realmadrid) December 22, 2020
لەسەر ئاستی تاکە کەسی چەندین خەڵاتی گەورە و شکۆداری وەرگرتووە، لە نمونەی خەڵاتی ئەمیری ئیستۆریاس. مەدالیای خاچی گەورە و مەدالیای شایستەی وەرزشیی شاهانە، هەروەها مەدالیای ئاڵتونی شاهانە، مەدالیای کۆمەڵگەی مەدرید.
لە ڕاگەیانراوەکەی یانەی شاهانەدا هاتووە، ” بەنسبەت ڕیاڵ مەدریدەوە شانازی و شەرەفێکی گەورەیە، کە یەکێک لە سەرکردە گەورەکانمان دەگەڕێتەوە بۆ نیشتیمان و لە یانەکەی خۆی دەستبەکاردەبێت”.
گەڕانەوەی کاسیاس بۆ مێرەنگییەکان بەباتێکی نامۆ نییە، بەڵکو لە پێشوودا ئیدارەی فلۆرنتینۆ پێرێز چەندین ئەستێرەی دێرینی وەک زێدان و ڕائول و کارلۆس و ئاربیلوای گەڕاندووەتەوە و پۆستی کارگێڕی پێبەخشیون.
