تیمێکی توێژینەوە گەیشتوونەتە ئەو ئەنجامەی بتوانن وزەی کۆکراوە لە خۆرەوە بگۆڕن بە کارەبا و رەوانەی سەر زەوی بکەن.
رۆژنامەی وۆڵ ستریت جۆرناڵ بڵاویکردەوە، توێژەران لە زانکۆی تەکنەلۆژیی کالیفۆرنیا لە مانگی رابردوودا دەستیانکرد بە تاقیکردنەقوەکانیان بۆئەوەی لەڕێگەی تەکنیکێکی نوێوە وزەی خۆر کۆبکەنەوە لە خولگەی دەوری زەوی و بە شەپۆلی کارۆموگناتیسی رەوانەی زەوی بکەن.
لەبارەی توێژینەوەکەوە عەلی حاجیمیری ئەندازیاری کارەبا لە زانکۆی تەکنەلۆژیی کالیفۆرنیا و یەکێک لە سەرپەرشتیارانی توێژینەوەکە دەڵێت، “ئێستا گواستنەوەی وزە لە بۆشایی ئاسمانەوە بۆ زەوی تەنها خەیاڵ نییە بەڵکو نزیک دەبێتەوە لە بەدیهاتن”.
توێژەران ئێستا سەرقاڵی پڕۆژەیەکن بۆ جێبەجێکردنی بیرۆکەی گواستنەوەی وزەی بۆشایی ئاسمان بۆ سەر زەوی لە رێگەی مانگە دەستکردەکانەوە.
لە دەیەی رابردوودا 100 ملیۆن دۆلار تەرخانکرا، بەمەبەستی ئاشکراکردنی ئەو تاقیکردنەوانەی دەریدەخەن دەکرێت وزەی خۆری بۆشایی ئاسمان بگوازرێتەوە بۆ سەر زەوی.
