هەڵمەتی رواندنی یەک ملیۆن نەمام كە لەسەر بڕیاری بافڵ جەلال تاڵەبانی سەرۆکی یەکێتیی نیشتمانیی کوردستان دەستیپێكردووە گەیشتە ناحیەی ئاغجەلەر و بەردەوام دەبێت.
دوای تەواوکردنی کاروبارەکانی دانانی سیاجی پێویست بۆ پڕۆژەکە لەپێناو پاراستنی نەمامەکان و دارستانەکە لەهەر زیادەڕەوییەک، ئەمڕۆ هەڵمەتی رواندنی نەمام لەنێو پرۆژەی دارستانی ئاغجەلەر سەر بە بەڕێوەبەرایەتیی دارستان و پاوانی سلێمانی بەڕێوەچوو.
لەمیانی بەشداریکردنی لە هەڵمەتەکەدا، رمک رەمەزان، قائیمقامی قەزای چەمچەماڵ بەناوی ئیدارەی ناوچەکەوە دەستخۆشی لەو هەنگاوەی سەرۆکی یەكێتی کرد و بە هەوڵێکی گرنگیزانی بۆ سەوزکردنەوەی ناحیەکە لەپێناو فەراهەمکردنی ژینگەیەکی لەبار بۆ دانیشتوانی ناوچەکە بەتایبەت کە لە سەردەمی رژێمی لەناوچوودا رووبەڕووی نەهامەتییەکی زۆر بوونەوە و ئەم هەنگاوەش یەکێکە لەو خزمەتانەی کە پێشکەشی هاوڵاتیانمان دەکرێت.
ئارام حازم، لێپرسراوی هۆبەی دارستان و پاوانی چەمچەماڵ رایگەیاند، هەڵمەتەکەی سەرۆک بافڵ جەلال تاڵەبانی دارستانی ئاغجەلەری دووبارە ژیاندەوە بەتایبەت کە زیاتر لە دە ساڵە کاری تێدا نەکراوە.
وتیشی، “بە دروستکردنی پەڵەی دەستکرد و چاندنی ئەو جۆرە نەمامانەی لەگەڵ ژینگەی ناوچەکەدا دەگونجێت زامنی سەرکەوتنی هەوڵەکانمان کردووە بۆ سەوزکردنی”.
هەروەك بە ناوی بەڕێوەبەرایەتیی دارستان و پاوانی سلێمانی-یەوە سوپاسی پێشوازی و بەتەنگەوە هاتنی بەڕێوەبەری ناحیەی ئاغجەلەر و شارەوانی و کشتوکاڵی کرد بۆ پەرۆشییان تا هەڵمەتی سەوزکردنی کوردستان ناوچەکەیان بگرێتەوە.
