تۆڕی کۆمەڵایەتیی ئینستگرام لەلای بەشێک لە بەکارهێنەران لە جیهان و عێراق کێشەی بۆ دروستبوو، بەڵام کۆمپانیای مێتای خاوەن تۆڕەکە دەڵێت، ئێستا کەوتووەتەوە کار.
کۆمپانیای مێتا رایگەیاند، لە بەشێک لە وڵاتان و لای هەندێک لە بەکارهێنەران وێنە و ڤیدیۆی تۆڕی کۆمەڵایەتەیی ئینستگرام کێشەی بۆ دروستبوو.
تۆڕە کۆمەڵایەتییەکە لای نزیکەی 200 هەزار بەکارهێنەر کێشەی بۆ دروستبوو، لای هەندێکیشیان بەتەواوی لەکارکەوت.
بەپێی کۆمپانیای مێتا، نزیکەی 54 هەزار بەشداربوویان لە بەریتانیا و 24 هەزاریان لە کەنەدا بوون.
هەروەها بەشێک لەو بەشداربووانەی کێشە لە ئینستگرامیاندا دروستبوو لە عێراق بوون.
بەڵام کۆمپانیاکە رایگەیاندووە، ئێستا کێشەکە لای سەرجەم بەشداربووان چارەسەربووە و تۆڕی ئینستگرام بەردەستە.
