بەهۆی هەبوونی گۆشتی بێ مۆر و سەربڕینی ئاژەڵ تێیدا، قائیمقامیەتی سلێمانی گۆشتفرۆشی “هەمووان”ی داخست.
لە راگەیەندراوێکدا قائیقمامیەتی سلێمانی بڵاویکردووەتەوە، ئەمڕۆ لە گەڕەکی خەبات گۆشتفرۆشی “هەمووان”یان داخستووە، بەهۆی ئەوەی پابەندنەبووە بە رێنماییە تەندروستییەکان و گۆشتی بێ مۆری فرۆشتووە.
راشیگەیاندووە، بەپێی رێنماییەکانی تەندروستی و ڤێتێرنەری، پێویستە ئاژەڵ لە سەربڕخانەی سلێمانی سەرببڕدرێت، چونکە پێش و پاش سەربڕین پشکنین بۆ ئاژەڵەکە و دواتریش گۆشتەکەی دەکرێت، پاشان مۆر دەکرێت و دەخرێتە بازاڕەوە.
گۆشتفرۆشی هەمووان لەناو دوکانەکەیدا ئاژەڵی سەربڕیوە و کۆگای ماڵەکەی خۆی بۆ سەربڕینی ئاژەڵ بەکارهێناوە و لە دوکانەکەشیدا گۆشتەکەی فرۆشتووە.
ئاماژە بەوەکراوە، دوکانەکە داخراوە و خاوەنەکەشی رووبەڕووی رێکاری یاسایه دەکرێتەوە.
