لە چوارچێوەی گەڕاندنەوەی ئەو ژن و منداڵانەی لەناو داعشدا بوون هێزەکانی سوریای دیموکرات 15 ژن و منداڵی ئەڵمانیان ڕادەستی سوپای ئەڵمانیا لەناو هاوپەیمانی نێودەوڵەتی دژی داعشدا کردووەتەوە.
بەپێی هەواڵێکی دی دەبلیوی ئەڵمانی، 100 ژن و منداڵی ئەڵمانی لەناو کەمپی هۆلدان لە ڕۆژئاوای کوردستان و بڕیارە هەموویان ڕادەستی سوپای ئەڵمانیا بکرێنەوە.
ئەو ژنانە لە چەند ساڵ پێش ئێستا لەکاتی دەسەڵاتی داعش لەناوچەکەدا لە ڕێگەی تورکیاوە خۆیان گەیاندووەتە مێردە جیهادییەکانیان یان چون و لەناو دەسەڵاتی داعشدا هاوسەرگیریان کردووە.
دوای شکستی دەسەڵاتی داعش لە عێراق و کۆتا جار لە سوریا چەکدارانی داعش و ژن و منداڵەکانیان لەیەکدی جیاکرانەوە، ئێستا ژن و منداڵەکانی داعش لە کەمپی هۆلن لە ڕۆژئاوای کوردستان کە نزیکەی 72 هەزار کەسن لەو کەمپەدا.
بەشێک لە ولاتانی جیهان لەوانە سوید و ئەڵمانیا هەوڵدەدەن خۆیان ئەو ژن و منداڵانە بگێڕنەوە کە خاوەنی ناسنامەی ئەو وڵاتەن، بەرلەوەی خۆیان بە قاچاخی بگەڕێنەوە.
وڵاتانی ئەوروپا بە تایبەت سوید، ترسی هەیە کە ژنان و منداڵانی داعش بە قاچاخی لە کەمپی هۆل هەڵبێن و بەگەرێنەوە وڵاتەکە، کە ئەمە دیسانەوە مەترسییەکی گەورەیە بۆسەر ئەو وڵاتە.
وڵاتانی ئەوروپا دەیانەوێت خۆیان منداڵان و ژنانی داعش بگەڕێننەوە تا لە سەنتەرەکانی چاکسازیدا بتوانن ئەو کەسانە ئامادەبکەنەوە لە کۆمەڵگەدا بژین، چونکە ئێستا منداڵەکانی جێماوی دەسەڵاتی داعش هەموویان هەڵگری فکری توندڕەوین، بەتایبەت بەرامبەر ئەوروپا.
