دەزگای ئاسایشی هەرێم دەستگیركردنی سێ بازرگانی ماددەی هۆشبەری راگەیاند كە لەلایەن بەڕێوەبەرایەتیی ئاسایشی گەرمیان و ئاسایشی سلێمانییەوە دەستگیركران.
بەپێی راگەیەندراوێكی دەزگای ئاسایشی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، لە ئەنجامی كۆكردنەوەی زانیاری و بەدواداچوون بۆ بەرەنگاربوونەوە و دەستگیركردنی بازرگانان و بەكارهێنەرانی ماددەی هۆشبەر، لەپێناو ئارامیی كوردستان و ڕێگریكردن لە بڵاوبوونەوەی هەر جۆرە ماددەیەكی هۆشبەر كە زیان بە كۆمەڵگا و ئابوریی وڵاتەكەمان دەگەیەنێت، پاش وەرگرتنی ڕەزامەندی دادوەری لێكۆڵینەوەی ئاسایش ، هێزەكانی بەڕێوەبەرایەتیی ئاسایشی گەرمیان بە هاوكاریی بەڕێوەبەرایەتیی ئاسایشی سلێمانی لە دوو هەڵمەتی جیاوازدا لە هەردوو شاری سلێمانی و كفری توانیان سێ تۆمەتباری بازرگانی ماددەی هۆشبەر دەستگیربكەن بە ناوەكانی:
( ش ، ع ، م ) لەدایكبووی ساڵی 1998 دانیشتووی سلێمانی
( أ ، ع ، ع ) لەدایكبووی ساڵی 1994 دانیشتووی سلێمانی
( ح ، ك ، أ ) لەدایكبووی ساڵی 1986 دانیشتووی كفری
تۆمەتباران بەپێی ماددەكانی ( 26 ) و ( 30 ) لە یاسای بەرەنگاربوونەوەی ماددە هۆشبەرەكان و كارتێكەرە عەقڵیەكان راگیراون و لێكۆڵینەوە لە كەیسەكەیان بەردەوامە.
