وەزارەتی دارایی عێراق، دەستیكردووە بە دابەشكردنی مووچەی مانگی ئایاری داهاتووی خێزانە كەمدەرامەتەكان و لە هەرێم گرفت بۆ مووچەی مووچەخۆرانی سلێمانی دروستدەكرێت.
وەزارەتی كار و كاروباری كۆمەڵایەتیی عێراق رایگەیاند، وەزارەتی دارایی دەستیكردووە بە دابەشكردنی مووچەی مانگی ئایاری زیاتر لە یەك ملیۆن و 680 هەزار خێزانی كەمدەرامەت.
بەپێی راگەیەندراوێكی ئەمڕۆی وەزارەتی كار و كاروباری كۆمەڵایەتی، كۆی مووچەی ئەو خێزانانە زیاترە لە 364 ملیار دینار و داوای لە خێزانەكان كرد سەردانی ناوەندەكانی دابەشكردنی مووچە بكەن بە مەبەستی وەرگرتنی مووچەكانیان.
دەستكردن بە دابەشكردنی مووچەی مانگی ئایار دوای ئەوە دێت، بەهۆی مانگی رەمەزان و نزیكبوونەوەی جەژنەوە، وەزارەتی دارایی عێراق لە سەرەتای ئەم مانگەدا دەستیكرد بە دابەشكردنی مووچەی مانگی نیسانی مووچەخۆران.
پێچەوانەی بەغداد، لە هەرێمی كوردستان مووچەی مانگی ئازاری رابردوو بە تەواوەتی دابەشنەكراوە و گرفت بۆ مووچەی مووچەخۆرانی سلێمانی و گەرمیان دروستدەكرێت، ئەمڕۆش لە هەولێر مووچەی خانەنشینانی پێشمەرگەی یەكێتی دابەشنەكرا.
