یانەی بایرن میونشنی ئەڵمانی لە هاوکێشەی کیلیان مباپێ هاتووەتە دەرەوە و بەڕێوبەری یانە باڤارییەکە دووپاتیدەکاتەوە، هیچ هەنگاوێک بە ئاڕاستەی کڕینی ئەو یاریزانە نانێن.
بەڕێوبەری جێبەجێکاری باڤاری، کارڵ هاینز ڕۆمەنیگە لە چاوپێکەوتنێکدا بە گۆڤاری لو فیگارۆی ئیسپانی ڕاگەیاندووە، ” کیلیان مباپێم خۆشدەوێت و حەزم بە شێوازی یاریکردنیەتی، بەڵام هەوڵ بۆ گواستنەوەی نادەین ڕووەو بایرن میونشن، ناسڕ خلێفی خاوەنی یانەی پاریس سانت جێرمان هاوڕێیەکی باشە و هەرگیز بە داواکارییەکی وەها بێزاری ناکەم”.
بەپێی زانیارییەکانی ڕۆژنامەی ئاس، کشانەوەی یانە زەبەلاحەکەی ئەڵمانیا لە هاوکێشەی مباپێ، ڕێگا بۆ یانەی ڕیاڵ مەدرید خۆشدەکات لە هاوینی 2021 بە تەنها هەوڵ بۆ گواستنەوەی ئاسکە فەرەنسییەکە بدات.
لە کاتێکدا یانەی بەرشلۆنە لە لێواری لەدەستدانی لیۆ مێسیدایە بۆ یانەی پاریس سانت جێرمان، یان مانچستەر سیتی، ئەگەر هەیە بۆ گواستنەوەی مباپێ تاکە یانە بێت کێبڕکێی ڕیاڵ مەدرید بکات.
مباپێ لە ساڵی 2017 بە شێوەی خواستن لە یانەی مۆناکۆوە پەیوەندی بە پاریس سانت جێرمانەوە کرد، لە هاوینی 2018 بۆندەکەی بەبڕی 180 ملیۆن یورۆ بەشێوەیەکی هەمیشەیی واژووکرا.
لەکۆی 14 یاری 103 گۆڵی لەسەرجەم خول و پاڵەوانێتیەکان بۆ پاریس تۆمارکردووە و نرخی گواستنەوەی زیاتر لە 200 ملیۆنە، ئیدارەی یانە فەرەنسییەکەی هەوڵەکانیان بۆ نوێکردنەوەی بۆندەکەی دەستپێکردووە.
