ئەمڕۆ 5ی ئازاری 2023 یادی راپەڕینی کوردە دژی رژێمی بەعس، یەکەم پریشکی راپەڕین لە قەزای رانیەی ناوەندی ئیدارەی راپەڕینی ئێستاوە دەستیپێکرد.
راپەڕینی گەلی کوردی باشووری کوردستان دژی حوکمی رژێمی بەعس و زۆرداریی ئەو دەسەڵاتە لە ماوەی 16 رۆژدا لە 5ی ئازار تاوەکو 21ی ئازاری خایاند و لەو ماوەیەدا سەرجەم ناوچەکانی هەرێمی کوردستان بە کەرکوکیشەوە ئازادکرا.
کۆتا شوێنی رزگارکراو لە 21ی ئازار و هاوکاتی یەکەم رۆژی نەورۆز لە شاری کەرکوک بوو.
راپەڕینی ئازاری 1991 بە پاڵپشتیی هێزی پێشمەرگە و خەڵکی شار و گوندەکانی کوردستان دەستیپێکرد و سەرجەم دامودەزگاکانی ناوچە کوردییەکان لەژێر دەستی حکومەتی بەعس دەرهێندران.
دوای 32 ساڵ لە رزگاکردنی شار و گوندەکانی هەرێمی کوردستان لە دەستی رژێمی بەعس، تا ئێستا حکومەتی راسپاردە نەیتوانیوە کێشەی مووچەی فەرمانبەرەکانی و جێبەجێکردنی پڕۆژە و خزمەتگوزارییە سەرەتایی و سەرەکییەکانی هاوڵاتییانی هەرێمی کوردستان چارەسەربکات.
دوای 32 ساڵ حکومەتی راسپاردە ناکۆکییەکان قوڵدەکاتەوە و پارێزگای سلێمانی و دایکی جێبەجێکردنی نەخشەی راپەڕین پەراوێز دەخات و لە مووچە و بودجە و پرۆژەکانی حکومەتی کوردی بێبەشی دەکات.
راپەڕین بۆ گەلی کورد ئاسۆی دەستپێکردنی ژیانێکی ئازادانە و هەنگاونان بەرەو گەیشتن بەو دەسەڵاتەی خەڵک خەونی پێوەدەبینی، بەڵام ئێستا هەر رۆژە و لە شارێکی هەرێمی کوردستان هاوڵاتییان زوڵمیان لێدەکرێت و زیندانی دەکرێن و لەلایەن کەسانی سەر بە حزبی دەسەڵاتەوە لێیاندەدرێت و ناچار بە جێهێشتنی شوێن و شارەکانیان دەکرێن.
