لە چوارچێوەی هەڵمەتی نیشتمانی ڕواندنی یەك ملیۆن نەمام و سەوزكردنی كوردستان لەسەر بڕیار و ڕاسپاردەی بافڵ جەلال تاڵەبانی سەرۆكی یەكێتیی نیشتمانیی كوردستان لە قۆناغی پێنجەمدا، سبەینێ یەكشەممە پرۆژەكە دەگاتە سنووری هۆبەی دارستان و پاوانی چەمچەماڵ و لە هەردوو دارستانی بانی مەقان و قەرەهەنجیر هەزاران نەمام دەڕوێندرێت.
ئەندازیار هاوكار جەلال بەڕێوەبەری دارستان و پاوانی سلێمانی لە لێدوانێكدا رایگەیاند، نەمام ڕواندن لە سلێمانی، شارەزوور، قەرەداغ، خەلەكان و بارەگای فەرماندەیی هێزەكانی 70 بەردەوامە و بە شێوەیەكی زانستی چەندین تیمی جیاجیا لە كاركردن بەردەوامن.
راشیگەیاند، “لەم قۆناغەشدا لە سنووری قەرەهەنجیر و چەمچەماڵ دەستپێدەكەین و مەبەستمان بووە هەڵمەتەكە بگەیەنینە ئەم ناوچانە، ئەم پرۆژە نیشتمانییەش كاریگەری لەسەر بەرفراوانكردنی دارستانەكان و زیادكردنی ڕووبەری سەوزایی دەبێت و هەوڵێكی گرنگیشە بۆ رووبەرووبونەوەی بەبیابانبوون و پاراستنی ژینگەی كوردستان”.
