دوو ژن لە شاری ورمێ لە ڕۆژهەڵاتی کوردستان بەهۆی کێشەی خێزانییەوە ئاگریان لە جەستەی خۆیان بەرداوە و خۆیان سوتاندووە.
یەکێک لەو ژنانەی کە دوو ڕۆژ پێش ئێستا لە گوندێکی دەوروبەری شاری ورمێ بەناوی گوندی “کانی ڕەش” بەهۆی ئەوەی لە تەمەنی 14 ساڵیدا هاوسەرگیریکردووە، کێشەی لەگەڵ هاوسەرەکەی هەبووە و دوو ڕۆژ پێش ئێستا لە تەمەنی 15 ساڵیدا ئاگری لە جەستەی خۆی بەرداوە و خۆی سوتاندووە.
کۆمەڵەی مافی مرۆڤ کە گرنگی بە هەواڵەکانی ڕۆژهەڵاتی کوردستان دەدات لەسەر ئەم ڕوداوە ئاشکرایکردووە، کچەکە ناوی ڕوناک عەزیزوەند بووە و بەهۆی کێشەی لەگەڵ هاوسەرەکەی دەستی بۆ خۆسوتاندن بردووە.
هاوکات بەپێی ڕاپۆرتێکی ڕێکخراوی هەنگاو کچێکی 16 ساڵ خەڵکی گوندی باوانی ورمێ، بەناوی “زەهرا ئیسماعیلی” بەهۆی کێشەی خێزانییەوە خۆی سوتاندووە و گیانی لە دەستداوە.
