سەرۆكی هەرێمی كوردستان پێشوازی لە تیمی هەڵبژاردەی تۆپی پێی عێراق دەكات و رایدەگەیەنێت، بردنەوەی جامی کەنداو سەرکەوتنی تەواوی وڵاتە.
نێچیرڤان بارزانی، سەرۆکی هەرێمی کوردستان ئێوارەی ئەمڕۆ لە هەولێر پێشوازی لە تیمی هەڵبژاردەی تۆپی پێی عێراق کرد و پیرۆزبایی لە هەڵبژاردەكە کرد بۆ بردنەوەی جامی پاڵەوانیەتیی (کەنداو 25) کە هەفتەی رابردوو لە بەسرا ئەنجامدرا.
نێچیرڤان بارزانی وێڕای بەخێرهێنان و دەربڕینی خۆشحاڵی بە سەردانی هەڵبژاردەی عێراق بۆ هەرێمی کوردستان ئاماژەی بەوەدا، بردنەوەی جامی کەنداو لەلایەن هەڵبژاردەی عێراقەوە، سەرکەوتنی تەواوی وڵاتە و دڵی هەموو عێراقییەکانی لە سەرتاسەری وڵات خۆشکرد.
لە دیدارەكەدا، كە وەزیری رۆشنبیری و لاوانی حکومەتی هەرێمی کوردستان و پارێزگارانی هەولێر و بەسرا و سەرۆکی یەکێتیی تۆپی عێراق و ژمارەیەک لە بەرپرسان ئامادەبوون، سەرۆکی هەرێم دووپاتیکردەوە، ئەم سەرکەوتنە بۆ عێراق و عێراقییەکان گرنگ بوو، چونکە هەموو عێراقییەکانی لە دەوری سەرکەوتنەکەدا کۆکردەوە، پەیامێکیشی گەیاندە جیهان کە عێراق گەڕایەوە و هەستایەوە سەر پێ.
لای خۆیانەوە سەرۆکی یەکێتیی تۆپی پێی عێراق و پارێزگاری بەسرا و راهێنەران و یاریزانان و ئەندامانی هەڵبژاردەکە، سوپاس و پێزانینیان بۆ ئامادەبوونی نێچیرڤان بارزانی لە ئاهه‌نگی ده‌ستپێكردنی خولی جامی پاڵەوانیەتیی (کەنداو 25) دووپاتکردەوە و خۆشحاڵیی خۆیان بە سەردانی هەرێمی کوردستان دەربڕی.
