بافڵ جەلال تاڵەبانی سەرۆكی یەكێتیی نیشتمانیی كوردستان رایدەگەیەنێت، لە ماوەی رابردوودا بەهۆی ناكۆكییە سیاسییەكانەوە هەرێمی كوردستان بە دۆخێكی سیاسی و ئابووریی ئاڵۆزدا تێپەڕی و كاریگەرییەكی نەرێنی لەسەر ژیان و گوزەرانی خەڵكە خۆشەویستەكەمان بەجێهێشت و ئەمەش خواستی یەكێتیی نیشتمانیی كوردستان نەبووە و هەرگیز ئەو خەڵكە تێكۆشەر و خۆڕاگرەمان بە شایستەی نائومێدبوون لە دۆخەكە و دروستكردنی دوودڵی لەناویاندا نەزانیووە.
سەرۆكی یەكێتی راشیگەیاند، “ئێمە لەپێناو ژیانی خەڵك و پاراستنی هەرێمەكەمان دەمانەوێت هەنگاوی دیبلۆماسی و بونیادنەرانە بنێین و سیاسەت ئامرازێك بێت بۆ خزمەتكردنی خەڵك نەوەك ترازان و دووركەوتنەوە. ئاشكراشە بژاردەی سەرەكی ئێمە هەمیشە تەبایی و یەكڕیزی بووە و بە هەمووشێوەیەك دژی ناكۆكی و دووبەرەكی وەستاوینەتەوە.
سەرۆك بافڵ جەختیكردەوە، “یەكێتی دەیەوێت لەپێناو گوزەرانی خەڵك و دەستەبەركردنی ژیانێكی شایستە، دۆخەكە بەرەو ئارامی و ئاشتەوایی ببات و سیاسەت بۆ ئێمە بریتی بووە لە بەهێزیی كورد و سەربەرزی خەڵكەكەی، لەم رێڕەوە مێژووییە لانادەین و درێژەی پێدەدەین و دەرگامان بۆ هەموو هێز و لایەنێك كراوەیە كە دەیەوێت بە ڕۆحێكی كوردانە و دوور لە بەرژەوەندیی تەسكی حزبایەتی كار بۆ چارەسەركردنی بنچینەیی كێشەكان بكات و خزمەتی هاوڵاتییان بكات بەبێ جیاوازی”.
لە پەیامەكەی بافڵ جەلال تاڵەبانیدا هاتووە، دەبێت هەموومان ئەو ڕاستییە بزانین كوردستان ئەو كاتە بەهێزترە كە متمانە لە نێوان هێزە سیاسییەكاندا هەبێت و پێكەوە لەپێناو كوردستان و خەڵكەكەی خەبات بكەین و پێویستە تێبگەین سیاسەت بە عینادی و ناوزڕاندن ناكرێت و بەرپرسیارێتیی گەورەمان بەرامبەر خاك و خەڵكەكەمان لەسەر شانە و دۆخی ئەمڕۆی هەرێم نەخوازراوە و سیاسەت بەمشێوەیە خزمەت بە هیچ كەسێك ناكات و خەڵك، هێزە سیاسییەكان و كەسایەتییە سیاسی، ئایینی، كۆمەڵایەتی و رۆشنبیرییەكانیش داوای چارەسەركردنی كێشەكان و زاڵبوون بەسەر بەربەستەكانمان لێدەكەن و دروستكردنی پشێوی و هەڵای میدیایی هەرگیز هۆكارێك نەبووە بۆ دڵخۆشكردنی خەڵك، بەڵكو ئامرازێك بووە بۆ نائومێدكردنیان لە كۆی هێزە سیاسییەكان و پرۆسەی حوكمڕانی لە وڵاتدا.
