شاندی حكومەتی هەرێم لە بەغداد لەگەڵ سەرۆك كۆماری عێراقدا كۆبووەوە.
فەرمانگەی میدیاو زانیاریی حكومەتی هەرێم بڵاویكردووەتەوە، ئەمڕۆ سێشەممە شاندی حكومەتی هەرێم لە بەغداد لەگەڵ د.عەبدولەتیف رەشید، سەرۆك كۆماری عێراقدا كۆبووەوە.
لە كۆبوونەوەكەدا گفتوگۆ لە بارەی ئەو دیدار و گفتوگۆیانە كران كە شاندی حكومەتی هەرێم لە ماوەی چەند رۆژی رابردوودا لە بەغداد ئەنجامی داون بۆ گەیشتن بە رێككەوتنێك لەگەڵ حكومەتی فیدراڵی لەبارەی جێگیركردنی پشكی هەرێم لە بودجەی گشتی ساڵی 2023 ی عێراق و كێشە هەڵپەسێردراوەكانی دیكەی نێوان هەولێر و بەغداد.
لە راگەیەندراوەكەدا هاتووە، سەرۆك كۆماری عێراق جەختی لەسەر پابەندبوون بە دەستوور وەك بنەمایەكی سەرەكی لە كۆبوونەوەكان كردەوە بۆ گەیشتن بە ڕێككەوتنێك كە لە بەرژەوەندیی تەواوی خەڵكی عێراق و هەرێمی كوردستاندا بێت.
