ژن و پیاوێك بەهۆی تەقینەوەی بوتڵی غازەوە سووتان و دۆخی تەندروستیی ژنەكە ناجێگیرە.
سامان لەتیف وتەبێژی تەندروستیی سلێمانی بە تۆڕی میدیایی ئێستای راگەیاند، بوتڵێکی غاز لە ماڵێكدا لە ناوچەی تاسڵوجەی سەر بە پارێزگای سلێمانی تەقیوەتەوە و ژن و مێردێک سووتاون.
بەپێی زانیارییەكان، ئەو بوتڵەی تەقیوەتەوە لە جۆری “پیكنیك” بووە و بەهۆی لێچوونەوە كاتێك خانەوادەكە سەرگەرمی ئامادەكردنی ژەمی بەیانی بوون، بوتڵەكە تەقیوەتەوە و ژن و پیاوەكە سووتاون و بەشێك لە ماڵەكەشیان سووتاوە.
لەو بارەیەوە سامان لەتیف ئاشكرایكرد، “پیاوەكە تەمەنی 70 ساڵە و 12%ـی جەستەی سووتاوە و ژنەكە تەمەنی 63 ساڵە و 46%ـی جەستەی سووتاوە، دوای رووداوەكە كەسوكاریان گەیاندوویانن بە نەخۆشخانەی ئیمێرجنسیی سلێمانی”.
وتیشی، “دۆخی تەندروستیی پیاوەكە جێگیرە، بەڵام ژنەكە لە دۆخێكی تەندروستیی ناجێگیردایە و چارەسەری پزیشكییان بۆ دەكرێت”.
