لە شاری سلێمانی ئامادەكارییەكان بۆ رێوڕەسمی شەوی یەڵدا دەستپێدەكات و قائیمقامی سلێمانیش دەڵێت، “ئەركی هەموو لایەكمانە پارێزگاری لەو فەرهەنگ و كەلتوور و دابونەریتانە بكەین كە مۆركێكێكی نەتەوەییان هەیە”.
بەپێی راگەیەندراوێكی قائیمقامیەتی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، وەك بەشێك لە ئامادەكارییەكان بۆ یادكردنەوەی شەوی چلە، ئەمڕۆ یەكشەممە، كۆمەڵەی كەلەپوور و فۆلكلۆری كورد سەردانی قائیمقامیەتی سلێمانییان كرد و پلان و ئامادەكارییەكانی یادكردنەوەی شەوی چلەیان خستووەتەڕوو.
لای خۆیەوە ئاوات محەمەد، قائیمقامی سلێمانی پاڵپشتی و هاوكاری و هەماهەنگی خۆی بۆ جێبەجێكردنی پلان و ئامادەكاريیەكانیان دەربری و رایگەیاند، ” گەلی كورد خاوەنی مێژوویەكی دوور و درێژی هەزاران ساڵەیە و ئەركی هەموو لایەكمانە كار بۆ زیندوو هێشتنەوەی ئەو دابونەریتانە بكەین كە مێژوویەكی دێرینیان هەیە”.
لە راگەیەندراوەكەدا هاتووە، عەبدوڵڵا بابان ئەندامی كۆمەڵەی كەلەپوور و فۆلكلۆری كورد رایگەیاند، “بە هاوكاریی قائیمقامی سلێمانی و بەپێی ئەو پلان و ئامادەكاریيانەی كە بۆ بەرێوەبردنی رێوڕەسمی شەوی چلە دانراون، لەو شەوەدا چەندین چالاكی و نمایشی جۆراوجۆری ئەدەبی و هونەری و فۆلكلۆری كوردی لە شاری سلێمانی ئەنجامدەدرێن كە هەریەك لەو چالاكیيانە خزمەت بە فەرهەنگ و كەلتوور و مێژووی كورد دەكات”.
شەوی چلە (یەڵدا) كە درێژترین شەوی ساڵە، دەكەوێتە 21 لەسەر 22ی (كانوونی یەكەم)ی هەموو ساڵێك و لەناو كوردەواریدا ساڵانە ئەو شەوە بە چەند شێوازێكی جیاجیا یاد دەكرێتەوە و چەندین چالاكی جۆراوجۆری تێدا ئەنجامدەدرێت.
