ماڵێك به‌هۆی فرۆشتنی نەوت و گازەوە لە سلێمانی داخرا و “خاوه‌نی ماڵه‌كه رووبه‌ڕووی رێكاری یاسایی ده‌كرێته‌وه”.
راگه‌یاندنی قائیمقامیه‌تی سلێمانی دەڵێت، سه‌رۆكی لیژنه‌ی سه‌لامه‌تیی كرێكار له لیژنه هاوبه‌شه‌كانی قائیمقامیه‌تی سلێمانی، چه‌ند جارێك خاوەنی ئەو ماڵەیان ئاگاداركردووه‌ته‌وه و پابه‌ندنه‌بووه، “له‌گه‌ڵ ئه‌وه‌شدا له رووی سه‌لامه‌تییه‌وه هیچ مه‌رجێكی سه‌لامه‌تیی تێدانییه، له‌سه‌ر سكاڵای هاوڵاتییان و به بڕیاری قائیمقامی سلێمانی ئه‌و ماڵه‌ی كه كراوه به شوێنی فرۆشتنی نه‌وت و گاز داخرا”.
قائیمقامیه‌تی سلێمانی داوا لە هاوڵاتییان دەكات لە کاتی هەبوونی گومان لە حاڵەتی لەو جۆرە، قائیمقامیه‌ت ئاگاداربكەنەوە و بۆ گەیاندنی سکاڵا و زانیاری بە قائیمقامیەتی سلێمانی و لیژنە هاوبەشەکان، پەیوەندی بە ژمارە مۆبایلی (07708677777)ـەوە بکەن.
