سەرۆكی هەرێمی كوردستان گەیشتە سلێمانی، بڕیارە جگە لە بەشداری پرسە و بەسەركردنەوەی شوێنی رووداوەكە، بریندارانیش بەسەربكاتەوە.
پاش نیوەڕۆی ئەمڕۆ نێچیرڤان بارزانی، سەرۆكی هەرێمی كوردستان بە سەرۆکایەتی شاندێك گەیشتە سلێمانی و بڕیارە سەرەتا بەشداری لە پرسەی قوربانیانی رووداوەكەی گەڕەکی کازیوەدا بکات.
دواتریش لە نزیكەوە شوێنی رووداوەكە بەسەردەكاتەوە، بەر لەوەی لە نەخۆشخانەی شار سەردانی برینداربووان بكات.
لە میانەی سەردانەكەیدا هێزەكانی دژەتیرۆر و كۆماندۆ، هاوشانی بەشێك لە هێزە ئەمنییەكانی دیكە ئەركی پاراستنی سەرۆكی هەرێم و شاندی یاوەریان لەئەستۆگرتووە.
شەوی پێنجشەممە 17ی تشرینی دووەم، لە گەڕەکی کازیوەی شاری سلێمانی بەهۆی غازی LPG-یەوە تەقینەوە لە خانوویەکی سێ نهۆمیدا روویدا، لە ئەنجامدا 15 کەس گیانیان لەدەستدا و 13ی دیکەش برینداربوون.
بەیانی ئەمڕۆ لە رێوڕەسمێکدا تەرمی 14 كەس لە قوربانییانی رووداوەكە لە گۆڕستانی کەڵەکن بەخاکسپێردران.
