دەسەڵاتدارانی ئەڵمانیا، 13 هەزار كەسیان لە شاری فرانكفۆرت لە ماڵ و شوێنكارەكانیان دوورخستەوە، هۆكارەكەش پەیوەندی بە بۆمبێكی سەردەمی جەنگی دووەمی جیهانەوە هەیە.
ئەمڕۆ یەكشەممە 6ی كانونی یەكەم، دسەڵاتداران لە ناوچەی غالوس لە شاری فرانكفۆرت سەرباری دوورخستنەوەی دانیشتووان، بازنەیەكی ئەمنییان بە دووریی 700 مەتر بە دەوری باڵەخانەیەكدا دروستكرد، باڵەخانەكە بۆمبێكی تیادا دۆزراوەتەوە كە كێشەكەی 500 كیلۆگرامە و پاشماوەی جەنگی دووەمی جیهانە.
سەرچاوەكانی هەواڵ لە ئەڵمانیا بڵاویانكردووەتەوە كە ئەوە یەكەم بۆمبی لەو شێوەیە نییە كە لەو شارەدا دەدۆزرێتەوە، پێشتریش چەندین بۆمبی سەردەمی جەنگی دووەمی جیهان لە فرانكفۆرت دا دۆزراونەتەوە، بەوپێیەی شارەكە لە سەروبەندی ئەو جەنگەدا، پایتەختی دارایی ئەڵمانیا بووە و هێزەكانی هاوپەیمانان بە چڕیی بۆردومان و تۆپبارانیان كردووە.
