رێكخراوی خۆراك و كشتوكاڵی سەر بە نەتەوە یەكگرتووەكان رایدەگەیەنێت، تێچووی هاوردەكردنی خۆراك لە سەرتاسەری جیهان بەرەو تۆماركردنی نزیكەی دوو ترلیۆن دۆلار لە ساڵی 2022دا دەچێت، ئەمە فشاری سەر وڵاتانی هەژار زیاتر دەكات.
نرخی خۆراك لە ئازاری رابردوودا بۆ ئاستی پێوانەیی بەرزبووەوە دوای شەڕی روسیا بۆسەر ئۆكرانیا، كە بەرهەمهێنی سەرەكیی دانەوێلە و تۆوە زەیتییەكانە، سەرەڕای ئەوەی لەوكاتەوە هەندێك پاشەكشەی كردووە بەڵام تائێستا نرخ بە بەرزی ماوەتەوە بەراورد بە ساڵی رابردوو.
ئەم زیادبوونە بەشێوەیەكی گەورە و نەگونجاو كاریگەری لەسەر وڵاتانی ئابوریی لاواز دروستدەكات، چاوەڕوانیش دەكرێت لە ساڵی داهاتووشدا بەردەوامبێت، لەگەڵ چاوەڕوانكردنی باشبوونێكی رێژەیی لەڕووی دابینكردنی كشتوكاڵەوە.
رێكخراوەكە لە راپۆرتەكەیدا دەربارەی پێشبینییەكان سەبارەت بە خۆراك كە ساڵانە دووجار بڵاویدەكاتەوە دەڵێت، “ئەم پێنوێنییانە نیگەران ئامێزە لە تێڕوانینی ئاسایشی خۆراكەوە”.
فاو دەڵێت، تێچووی هاوردەكردنی خۆراك لە جیهاندا پێشبینی دەكرێت لەمساڵدا بگاتە 1.94 ترلیۆن دۆلار، بە زیادبوونی 10% لەسەر بنەمای ساڵانە و بەرزتر لەوەی پێشتر پێشبینی دەكرا.
ئاماژەی بەوەشكردووە، قەبارەی هاوردەكردنی خۆراك لە وڵاتانی داهات نزمدا 10% دابەزیوە، لەگەڵ مانەوەی لیستی خۆراك لەمساڵدا تاڕادەیەك بەبێ گۆڕانی ئەوتۆ، ئەمەش ئاماژەیە بۆ كێشەكانی بەدەستهێنانی خۆراك.
فاو دەڵێت، “هاوردەكاران رووبەڕووی دژواریی لە دەستەبەركردنی پارە بۆ زیادبوونی تێچووە جیهانییەكان دەبنەوە”.
سەبارەت بە پێداویستییەكانی بەرهەمهێنانی كشتوكاڵ، بۆ نمونە وەك سەماد، كە پێویستی بە وزەی زۆرە بۆ بەرهەمهێنانی، فاو دەڵێت، تێچووی هاوردەی جیهانی ئاراستەكەی زیادبوونە بەرەو نزیكەی 50%ی ئەمساڵ بۆ 424 ملیار دۆلار، ئەمەش هەندێك وڵات ناچاردەكات بە كڕین و بەكارهێنانی سەمادی كەمتر.
بەپێی رێكخراوەكە، ئەمەش لە كۆتایدا دەبێتە هۆی كەمبوونەوەی بەرهەمهێنان و دابەزینی خۆراكی بەردەستی ناوخۆ و “كاردانەوەی نەرێنی لەسەر بەرهەمهێنانی جیهانیی كشتوكاڵ و ئاسایشی خۆراك” لە 2023دا.
دەربارەی پێشبینییەكانیش بۆ 2022-2023، رێكخراوەكە پێوایە بەرهەمهێنانی گەنم بەڕێژەی 0.6% لەسەر ئاستی ساڵانە بەرزدەبێتەوە و دەگاتە ئاستی پێوانەیی لە 784 ملیۆن تۆن، لەگەڵ تێبینیكردنی ئەوەی زیادبوونە پێشبینیكراوەكە بە زۆریی لە چین و روسیا دەبێت.
لایەنە ئەرێنییەكە وەك ئەوەی فاو دەیڵێت ئەوەیە كە بەرهەمهێنانی تۆوە زەیتییەكان پێشبینی دەكرێت 4.2% زیادبكات و بەوەش بگاتە بەرزترین ئاستی بێ پێشینە، هەروەها زیادبوونی بەرهەمهێنانی شەكر بە 2.6%، لەكاتێكدا پێشبینی دەكرێت بەرهەمهێنانی برنج لە ئاستی خۆیدا بمێنێتەوە.
