سەرۆکی لیژنە هاوبەشەکانی قائیمقامیەتی سلێمانی رایگەیاند، رۆژانە سەردانی فرۆشگای خوێندنگەکان دەکەین و بەردەوام چاودێریی کوالێتی خواردن و پاکوخاوێنیان دەکەین.
رێکان جەمال سەرۆکی لیژنە هاوبەشەکانی قائیمقامیەتی سلێمانی بە تۆڕی میدیایی ئێستای راگەیاند، “لە دوای ئەوەی لە ماوەی رابردوودا فرۆشگای خوێندنگەیەک بەهۆی نەخۆشکەوتنی ژمارەیەک خوێندنگە داخرا، دواتر فرۆشگاکە کرایەوە و لە ئێستادا بەردەوام چاودێریی دەکەین”.
باسی لەوەش کرد، “ئەوەندەی ئێمە چووین و پشکنینمان بۆ فرۆشگاکە کردووە لە ئێستادا کوالێتی خواردنەکان و پاکو خاوێنی لە ئاستێکی باشدایە”.
ئاشکراشی کرد، “ئێمە رۆژانە سەردانی فرۆشگای خوێندنگەکان دەکەین، بەردەوام چاودێری دەکەین، هەندێک فرۆشگا تەواو پابەندن و هیچ کێشەیەکیان نییە، هەشمانە وەسلی غەرامە یان ئاگادارکردنەوەی بۆ دەردەکەین، هەر فرۆشگایەکیش پابەند نەبێت بە دڵنیاییەوە دادەخرێت”.
