سەرۆكی لیژنەی هەڵمەتی لابردنی سەرپێچیی زیادەڕۆیی سەر تۆڕەكانی كارەبا ڕایدەگەیەنێت، لە دوو ڕۆژی ڕابردوودا كارەبای 200 شوێن و بینای بازرگانی بڕدراون.
بەپێی ڕاگەیەندراوێكی بەڕێوەبەرایەتیی گشتیی كارەبای سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، ئەنور حەمەسەعید سەرۆكی لیژنەی هەڵمەتی لابردنی سەرپێچیی زیادەڕۆیی سەرتۆڕەكانی كارەبا ئاشكرایكرد، دوای پیكهێنانی لیژنەیەك بۆ نەهێشتنی سەرپێچی و زیادەڕۆیی لە بەڕێوەبەرایەتیی دابەشكردنی كارەبای سلێمانی، ئەمڕۆ پینجشەممە لە چەند شوێنێكی جیاجیای ناوشاری سلێمانی و دەوروبەری كارەبای ژمارەیەك شوێن و بینای بازرگانی بڕدران كە قەرزێكی زۆریان لەسەربووە.
لە ڕاگەیەندراوەكەدا هاتووە، بەهۆی پێنەدانی قەرزی كارەبا و نەبوونی پارەی كارەباوە لە دوو ڕۆژی ڕابردوودا لە ڕێگەی لیژنەكانەوە زیاتر لە 200 شوێن و بینای بازرگانیی كارەباكانیان بە كاتی بڕدراوە كە قەرزەكانیان لە سەروو 10 ملیۆن دینارەوەیە.
