لەلایەن هێزەكانی پۆلیسی دارستانەوە دوو كەس لە دەربەندیخان دەستگیركران بەهۆی بەنایاسایی گواستنەوەی دوو كەڵی كێوی.
بەڕێوەبەرایەتیی پۆلیسی دارستان و ژینگەی سلێمانی بڵاویكردەوە، مەفرەزەیەکی بەشی پۆلیسی دارستانی دەربەندیخان بە هاوکاری کارمەندانی ئاسایشی بازگەی تونێلی دەربەندیخان توانیان دوو هاوڵاتی دەستگیربکەن کە ژمارەیەک ئاژەڵی ماڵیان پێبووە و لەنێویاندا دوو كەڵی كێوی تیابووە.
دەشڵێت، دەستگیركراوەكان بەنیازبوون گیاندارە كێوییەكان بەشێوەیەكی نایاسایی بۆ شوێنێكی دیكە بگوازنەوە.
جگە لە دەستگرتن بەسەر ئۆتۆمبێلەكەیاندا، پەڕاوی لێکۆڵینەوە ڕێکخراوە و ڕادەستی دادوەر کراوە بۆ وەرگرتنی ڕێکاری یاسایی، وەك ئەوە پۆلیسی دارستانی سلێمانی ئاماژەی پێداوە.
