10 قاچاخچیی بەنزین دەستگیركران و دەستگیرا بەسەر 11 تانكەری گواستنەوەی سووتەمەنیدا كە بەشێكیان لە كەركوكەوە هەوڵی بەقاچاخبردنی بەنزینیان داوە.
بەڕێوەبەرایەتیی پۆلیسی وزە ئەمڕۆ یەكشەممە ڕایگەیاند، مەفرەزەكانیان لە ماوەی 48 كاتژمێردا 10 قاچاخچیی بەنزینیان دەستگیركردووە و دەستگیراوە بەسەر 11 تانكەری گواستنەوەی سووتەمەنیدا.
بەپێی ڕاگەیەندراوی بەڕێوەبەرایەتییەكە، لە كەركوك پێنج تۆمەتباری بەقاچاخبردنی بەنزین و بەرهەمەكانی نەوت دەستگیركراون و دەستگیراوە بەسەر پێنج تانكەردا، چونكە بە ڕێگەیەكی دیكەدا كە جیاواز بوو لەو ڕێگە و شوێنەی بۆیان دیاریكرابوون بەنزینیان دەگواستەوە.
بەڕێوەبەرایەتیی پۆلیسی وزەی عێراق ئاشكرایكرد، لە بەغداد چوار تۆمەتباری دیكەی بەقاچاخبردنی بەنزین دەستگیركراون و دەستگیراوە بەسەر چوار تانكەری پڕ لە بەنزیندا كە بە شێوەی نایاسایی دەیانگواستەوە، هەر لەو ماوەیەدا تۆمەتبارێكی دیكە لە بەسڕە دەستگیركراوە و دەستگیراوە بەسەر دوو تانكەری بەنزیندا كە نووسراوەكانیان نایاسایی بوون.
وەك بەڕێوەبەرایەتیی پۆلیسی وزە دەڵێت، “هەموو ئەو تۆمەتبارانە دادگاییدەكرێن و بەپێی ماددەی 41ی ساڵی 2008ی یاسای بەقاچاخبردنی نەوت و بەرهەمەكانی، لێپێچینەوەیان لەگەڵدا دەكرێت بۆ ئەوەی سزای دادپەروەرانە بدرێن”.
