قوباد تاڵەبانی جێگری سەرۆکی ئەنجومەنی وەزیران، جەختیكردەوە كە سیستمی کارکردن لەناو دامودەزگاکانی حکومەت پێویستی بە چاکسازییە و دەڵێت، نەهێشتنی ڕۆتین لە کارە لەپێشینەکانی حکومەتە.
ئەمڕۆ دووشەممە قوباد تاڵەبانی جێگری سەرۆکی ئەنجومەنی وەزیران، لەگەڵ سەرۆکایەتیی دیوانی سەرۆکایەتیی ئەنجومەنی وەزیران و فەرمانگەکانی سەر بە دیوان لە هەولێر کۆبووەوە و داوای لێکردن بەردەوامبن لە چاکسازیی ئیداری لەپێناو باشتر خزمەتکردنی هاوڵاتییان.
جێگری سەرۆک وەزیران، جەختیكردەوە كە سیستمی کارکردن لەناو دامودەزگاکانی حکومەتی هەرێم پێویستی بە چاکسازیی بەردەوام هەیە و داوای لە سەرۆکی فەرمانگەکان کرد، بەردەوامبن لەو چاکسازییە بۆ ئەوەی بتوانن بە زووترین کات مامەڵەی هاوڵاتییان ڕابپەڕێنن و خزمەتەکان بە ئاسانترین و باشترین شێوە پێشکەشی خزمەتخواز بکرێن.
قوباد تاڵەبانی دووپاتیكردەوە كە یەکێک لە کارە لەپێشینەکانی حکومەتی هەرێم، نەهێشتنی ڕۆتینە لە دامودەزگاکاندا و لەو پێناوەشدا پڕۆژەی خزمەتمان سەرپێخستووە کە یەکێک لە ئامانجەکانی ئەو پڕۆژەیە نەهێشتنی ڕۆتینە، وەك ڕاگەیەندراوی نووسینگەكەی ئاشكرایكرد.
