هادی عامری سەرۆكی هاوپەیمانیی فەتح و عەمار حەكیم سەرۆكی ڕەوتی حیكمە، داوای هێوركردنەوەی دۆخی عێراق، دانبەخۆداگرتن و گفتوگۆی ڕاستەوخۆ لە سەدر دەكەن.
ئەمڕۆ شەممە هادی عامری سەرۆكی هاوپەیمانیی فەتح و عەمار حەكیم سەرۆكی ڕەوتی حیكمە لە دوو پەیامی جیاوازدا لەبارەی خۆپیشاندانی لایەنگرانی سەدرەوە هاتنەدەنگ. عامری داوادەكات ڕەوتی سەدر و چێوەی هەماهەنگی دۆخەكە هێوربكەنەوە و زمانی گفتوگۆ و لێكتێگەیشتن زاڵبكەن و چارەسەری ئاشتییانە ئامادەبكەن لەسەر بنەمای لێكتێگەیشتن و سازشی دوولایەنە و ڕێزگرتن لە دەستوور و یاسا.
لە پەیامەكەیدا عامری ڕووی وتەكانی لە ڕەوتی سەدر و چێوەی هەماهەنگی كردووە و نووسیویەتی، “بۆ هەموو برایانی ئازیز هاوبەشانی نیشتمان لە چێوەی هەماهەنگی و ڕەوتی سەدر و هەر كەسێك ژیانی عێراق و عێراقییەكانی بەلاوە گرنگە، داواتان لێدەكەم ڕێبازی هێوركردنەوە و دانبەخۆداگرتن و ئارامی بگرنەبەر” و دەڵێت، “هەموو ئەوانەی تا ئێستا ڕوویانداوە لە سنووری پەیڕەوكردنی دیموكراسیدان”.
هاوكاتی عامری، عەمار حەكیم سەرۆكی ڕەوتی حیكمە پەیامێكی بڵاوكردەوە و جەختدەكاتەوە لە پێویستیی زاڵكردنی زمانی ئاوەز و لۆژیك و گفتوگۆ و سازشكردن بۆ عێرق و گەلەكەی.
سەرۆكی ڕەوتی حیكمە دەڵێت، “بە دڵێكی ڕاستگۆ و نیازێكی باشەوە داوایەكی كراوە ئاراستەی برایانی ڕەوتی سەدر و هێزەكانی چێوەی هەماهەنگی دەكەین بچنە گفتوگۆیەكی كراوەی ڕاستەوخۆی بنیادنەرەوە”.
عەمار حەكیم داوا لە هەردوولا دەكات دانبەخۆیاندا بگرن و ئەوپەڕی دانایی بنوێنن بۆ بەرگرتن لە ونبوونی وڵات.
