خۆپیشاندان دژی كاندیدكردنی سودانی فراوانتربوو، خۆپیشاندەران گەیشتنە ناوچەی سەوزی بەغداد و هەوڵی تێپەڕاندنی بەربەستە كۆنكرێتییەكان دەدەن.
ئەمڕۆ چوارشەممە لایەنگرانی ڕەوتی سەدر دژی كاندیدكردنی محەمەد شیاع سودانی بۆ پۆستی سەرۆك وەزیران، خۆپیشاندانیان لە گۆڕەپانی تەحریری بەغداد دەستپێكرد و دروشم دژی كاندیدكردنی ناوبراو دەڵێنەوە.
هێزە ئەمنییەكان لە شوێنی خۆپیشاندانەكە بڵاوبوونەوە، بەڵام خۆپیشاندانەكە پەرەیسەند و كەمێك لەمەوبەر خۆپیشاندەران گەیشتنە ناوچەی سەوز و هەوڵی تێپەڕاندنی بەربەستە كۆنكرێتییەكان دەدەن.
بەپێی زانیارییەكان، خۆپیشاندەران كرێنیان بردووەتە ناوچەكە بۆ لابردنی بەربەستە كۆنكرێتییەكان و چوونە ناو ناوچەی سەوز، هێلیكۆپتەری سەربازییش بە ئاسمانی ناوچەكەدا دەسووڕێنەوە بۆ پاراستنی دامەزراوە حكومییەكان و نوێنەرایەتیی وڵاتان.
