ئەمڕۆ شەممە مەسعود بارزانی سەرۆكی پارتی دیموكراتی كوردستان، لەگەڵ فراکسیۆنی پارتی لە ئەنجومەنی نوێنەرانی عێراق کۆبووەوە.
كۆبوونەوەكە لە سەڵاحەدین بەڕێوەچووە و بەپێی ڕاگەیەندراوی كۆتایی كۆبوونەوەكە، مەسعود بارزانی ڕایگەیاندووە، “ھەموو پێداگری و ھەوڵی پارتی لە پرۆسەی دوای هەڵبژاردن بۆ ئەوە بووە کە ئەنجامی ھەڵبژاردنەکان خزمەتی سەقامگیری و گوزەرانی ھاوڵاتییان و چارەسەرکردنی کێشەکان بکات”.
سەرۆكی پارتی جەختیكردووەتەوە لەوەی “دەبێت گرفتەکان لە ڕێگەی پابەندبوون بە دەستوور و ڕەچاوکردنی ھەر سێ پرەنسیپی هاوبەشی و سازان و هاوسەنگییەوە چارەسەربکرێن و ئەم پرەنسیپانە دەبێت لەسەر کاری حکومەتی داھاتوو و ھەموو کوتلە سیاسییەکان ڕەنگبدەنەوە”.
وەك ڕاگەیەندراوی كۆبوونەوەكە دەڵێت، مەسعود بارزانی دووپاتیكردووەتەوە كە “پارتی لەگەڵ ناکۆکی و قووڵبوونی قەیرانەکان نییە بەڵکو ئەوەی بەلایەوە گرنگە پاراستنی مافە دەستورییەکان و کەرامەتی ھاوڵاتییانە”.
سەرۆكی پارتی دیموكراتی كوردستان جەختیکردووەتەوە، “پێویستە ئەندامانی فراکسیۆنی پارتی لە پەرلەمانی عێراق خۆیان بە خزمەتکاری ھاوڵاتییان و دەنگدەران و خۆیان بە بەرگریکاری مافەکانی خەڵک بزانن و کرداریان زیاتربێت لە قسەکردن”.
