دیپلۆماتكارێكی ئێرانی ڕایدەگەیەنێت، دوای سەردانەكانی كازمی سعودیە و ئێران باڵیۆزخانە لە وڵاتی بەرامبەر دەكەنەوە و سەردانەكانی سەرۆك وەزیرانی عێراقیش بۆ ئەومەبەستە بوون.
هادی ئەفقی، دیپلۆماتکاری پێشووی ئێران، ناوەڕۆکی سەردانەکەی مستەفا کازمی بۆ تارانی پایتەختی ئێران ئاشکرا کرد.
ئەفقی بە میدیا عێراقییەكانی وتووە، کازمی بە پەیامێکی گرنگ خۆی گەیاندووەتە سعودیە و ئێران، کە بریتییە لە گێڕانەوەی پەیوەندییەکانی نێوان هەردوو وڵات و كردنەوەی باڵیۆزخانە لە هەردوو وڵاتەكەدا.
بە وتەی ئەو دیبلۆمەتكارە، كە وەكو زانیاریی لە بەرپرسێكی وەزارەتی دەرەوەی ئێران دەستیكەوتووە، كازمی نامەیەكی دەمی یان نووسراوی لە بەرپرسانی سعودیەوە بردووەتە تاران بۆ گەڕاندنەوەی پەیوەندییەكانی نێوان هەردوو وڵات.
باسی لەوەشكردووە، ئێران هەنگاوەكانی كازمی بە ئەرێنی ناوبرد بۆ گەڕاندنەوەی پەیوەندییەكانی نێوانیان لەگەڵ سعودیە و پێیوایە، كە عێراق سودێكی زۆر لە باشبوونەوەی پەیوەندییەكانی نێوان ئەو دوو وڵاتە دەبینێت.
