ڤۆلۆدیمێر زیلینسكی سەرۆكی ئۆكرانیا دەڵێت، “ئەفریقا بارمتەی ئەو كەسانەیە كە جەنگیان لە دژی وڵاتەكەمان بەرپاكردووە و ئەو كیشوەرەیان برسیكردووە”.
دوایین وتاری سەرۆكی ئۆكرانیا، كە لە ڕێگەی ڤیدیۆوە لە بەردەم یەكێتیی ئەفریقادا خوێندییەوە، باسكردنی كاریگەرییەكانی جەنگ بوو لەسەر دۆخی خۆراك لە وڵاتان و بە تایبەت وڵاتانی كیشوەری ئەفریقا.
بەهۆی جەنگی ڕوسیاوە، هەناردەكردنی دانەوێڵە بە تایبەت گەنم و گەنمەشامی و ڕۆنی گوڵەبەڕۆژە و پەیینی كیمیایی لە ئۆكرانیاوە بۆ وڵاتان ڕاگیراوە، جەنگەكە و گەمارۆی ڕوسیا دەروازە ئاوییەكانی ئۆكرانیایان داخستووە.
لە وتارەكەیدا بۆ ئەفریقییەكان ڤۆلۆدیمێر زیلینسكی سەرۆكی ئۆكرانیا وتی، “كیشوەرەكەتان خزێنراوەتە قەیرانێكەوە كە دەستكردە و خۆی هۆكاری قەیرانەكە نییە، ئەفریقا بارمتەی ئەو كەسانەیە كە جەنگیان لە دژی وڵاتەكەمان بەرپاكردووە”.
زیلینیسكی وتی، “ڕەنگە ئەم جەنگە دووربێت لە ئێوە و وڵاتەكانتانەوە، بەڵام بەرزبوونەوەی نرخی خۆراك كاریگەریی كارەساتئامێزی هەیە لەسەر ملیۆنان خێزانی ئەفریقی”.
