تەندروستيی سلێمانی بڵاویكردەوە، لەماوەی 24 كاتژمێری ڕابردوودا 656 كەس بەهۆی سكچوون و ڕشانەوەوە لە نەخۆشخانەكانی سلێمانی هێڵدراونەتەوە.
بەڕێوەبەرایەتیی گشتیی تەندروستیی سلێمانی ئاماری 24 كاتژمێری بڵاوكردەوە و ڕایگەیاند، لە نەخۆشخانەكانی شار 136 نەخۆش، شەهید دكتۆر هێمن 298، شۆڕش 140 و منداڵان 82 نەخۆش هێڵدراونەتەوە.
ڕوونیشیكردووەتەوە، سەرجەم حاڵەتەكان بەهۆی سكچوون و ڕشانەوەیە كە ماوەیەكە لە شارەكەدا بڵاوبووەتەوە.
پێشتر سەباح هەورامی بەڕێوەبەری گشتیی تەندروستی سلێمانی لە کۆنگرەیەکی ڕۆژنامەوانیدا ڕایگەیاندبوو، لە نەخۆشخانەی شار هیچ شوێنێکیان بۆ نەخۆش نەماوە.
ئاماژەی بەوەشکردبوو، مەترسیی ئەوەیان هەیە ئەو سکچوون و ڕشانەوەیەی بڵاوبووەتەوە پەتای کۆلێرا بێت، وتیشی ژمارەی تووشبووان زۆر زۆرە و ڕێکار و ئامادەکارییەکانیان بۆ ڕووبەڕووبوونەوەی دەستپێکردووە.
