پەیامنێری تۆڕی میدیایی ئێستا لە هەولێر ڕایگەیاند، شەوی ڕابردوو 30 ی تشرینی دووەم گەنجێک کە کوڕی بەرپرسێکی سەربازییە لەسەر کێشەی قەرز بە چەقۆ کوژراوە.
بەپێی زانیارییەکان گەنجەکە ناوی نێچیرڤانە و پارەی لای کەسێکی دیکە بووە، کاتێک ڕۆشتووە لێی وەربگرێتەوە، بووە بە دەمەقاڵێیان و پاشان قەرزارەکە بە چەقۆ هێرشیکردوەتە سەر نێچیرڤان و کوشتوویەتی لە شەڕەکەدا دوو کەسی دیکەش برینداربوون.
گەنجە کوژراوەکە کوڕی عەمیدێکی زێرەڤانییە بەناوی چیچۆ هەرکی و کاتێک ڕۆشتووە بۆ وەرگرتنەوەی قەرزەکەی لە نزیک کافتریایەک لەسەر شەقامی 100 مەتری هەولێر قەرزارەکەی بینووە و لەوێ شەڕەکە ڕویداوە.
بەپێی زانیارییەکان لەو دوو کەسەی کە لە شەڕەکەدا برینداربوون برینی یەکێکیان قورسە و لە نەخۆشخانە لەژێر چاودێریدایە.
