دوای ئەوەی بۆ هەولێر و دهۆك دابینكرا، بڕیارە ئەمڕۆ بەنزینی 800 دیناری بۆ پارێزگای سلێمانیش دابینبکرێت.
بەپێی زانیارییە میدیاییەكان، سێ ملیۆن لیتر بەنزین لە جۆری نۆرماڵ ڕەوانەی هەولێر و دهۆک کراوە و یەک لیتری بە 800 دینار دەدرێت بە شۆفێران.
لەو بارەیەوە پەرلەمانتار عەلی حەمەساڵح دەڵێت، ئەمڕۆ بەنزینەکە بۆ سلێمانیش دابیندەکرێت و لە پاڵاوگەکانی سلێمانی بەرهەمدەهێنرێت و بە هەمان نرخ (800 دینار بۆ هەر لیترێك) دەدرێت بە شۆفێران.
لەگەڵ ئەو گۆڕانکارییەدا ڕۆژانە یەک ملیۆن لیتر بەنزینی 690 دیناری بۆ پاس و تاکسی دابیندەکرێت، هەروەها بەنزینی جۆرەكانی موحەسەن و سوپەر گومرگیان لەسەر هەڵدەگیرێت.
هەروەها هەوڵێکی تری حکومەتی هەرێم بۆ کەمکردنەوەی نرخی بەنزین، ئەوەیە کە ڕێگە بە بازرگانان دەدرێت سووتەمەنی هاوردەبکەن و قۆرخکاری کەمدەکرێتەوە.
ئەم هەنگاوانە دوای ئەوە دێن كە حكومەتی هەرێم لە كۆبوونەوەی دوێنێدا بڕیاریدا گرفتی گرانیی بەنزین چارەسەر بكات.
بەپێی پێشبینییەكان و زانیاریی سەرچاوە ئاگادارەكان، پێدەچێت نرخی لیترێک بەنزینی موحەسەن بۆ 950 – 1000 دینار داببەزێت.
