بافڵ جەلال تاڵەبانی، سەرۆكی یەكێتیی نیشتمانیی كوردستان لە بەغداد چاویكەوت بە فایەق زێدان، سەرۆكی ئەنجومەنی باڵای دادوەریی عێراق.
لە دیدارێكدا جەخت لە دەسەڵاتی دادوەری و سەربەخۆیی دادگاكان كرایەوە و هەردوولا هاوڕابوون لەسەر چەسپاندنی یاسا و پارێزگاریكردن لە دەستوور لەپێناو سەقامگیری سیاسی، ئابوری و كۆمەڵایەتی لە وڵاتدا.
ھەر لە دیدارەكەدا گفتوگۆ لەبارەی یەكخستنی هەوڵەكان و تەواوكردنی ڕێكارە یاسایی و دەستوورییەكان كرا بۆ پێكهێنانی حكومەتێكی نیشتمانیی خزمەتگوزار بە بەشداریی هەموو لایەنە سیاسییەكان و دروستكردنی حكومەتێك كە ببێتە چەترێك بۆ هەموو عێراقییەكان و كار بۆ بونیادنانی داهاتوویەكی سەقامگیر بكات.
فایەق زێدان، سەرۆكی ئەنجومەنی باڵای دادوەریی عێراق بەگرنگییەوە باسی لە ڕۆڵ و پێگەی سەرۆك مام جەلال كرد و ڕایگەیاند، عێراقی نوێ دەبێت سوپاسگوزاری سەرۆك مام جەلال بێت، چونكە ئەو كۆكەرەوەی هەموو دەنگ و ڕەنگە جیاوازەكان بوو. هەروەها ستایشی هەوڵەكانی سەرۆك بافڵی كرد كە لە ماوەی ڕابردوودا ڕۆڵێكی ئەرێنی بینیووە لە یەكخستنی هێز و لایەنە سیاسییەكان و هۆكارێك نەبووە بۆ دروستكردنی پشێوی و دووبەرەكی.
وتیشی ئێمە بەم هەنگاوە دروست و كاریگەرانەدا، سیاسەتی حەكیمانەی سەرۆك مام جەلالمان دێتەوە یاد و دڵنیاین یەكێتیی نیشتمانیی كوردستان درێژەپێدەری ئەو ڕێبازە دەبێت.
لە بەرامبەردا سەرۆك بافڵ داوای لە سەرۆكی ئەنجومەنی باڵای دادوەری كرد ڕۆڵی مێژوویی خۆیان بگێڕن و پارێزەری مافی ھەموو عێراقییەكان بن بە نەتەوە وپێكھاتەكانیشەوە. هەروەها هاوكار و پشتیوان بێت بۆ داكۆكیكردن لە مافە یاسایی و دەستوورییەكانی هەرێمی كوردستان.
