بەڕێوەبەرایەتیی گشتیی تەندروستیی سلێمانی لەگەڵئەوەی جەخت لە زۆری ژمارەی تووشبووانی سکچوون و ڕشانەوە دەدات لە شارەکە، دڵنیاییش دەداتە هاوڵاتییان هیچ حاڵەتێکی کۆلێرا لە پشکنینەکاندا دەستنیشان نەکراوە.
لە لێدوانێکدا بۆ تۆڕی میدیایی ئێستا سامان شێخ لەتیف وتەبێژی بەڕێوەبەرایەتیی گشتیی تەندروستیی سلێمانی وتی، ئێستا ژمارەیەکی زۆری تووشبووی سکچوون و ڕشانەوە لە نەخۆشخانەکان هەن، هەردوو نەخۆشخانەی منداڵان و نەخۆشخانەی شاریش نزیکن لە پڕبوون.
وتیشی، ئەمڕۆ بەڕێوەبەری گشیتیی تەندروستیی سلێمانی لەگەڵ بەڕێوەبەری نەخۆشخانەکانی سلێمانی کۆبووەوە و مەبەستی کۆبوونەوەکەش ئامادەکارییە بۆ ڕووبەڕووبوونەوە و لێکۆڵینەوەیە لە هۆکاری بڵاوبوونەوەی ئەو نەخۆشییە لە سلێمانی.
سەبارەت بە ئەگەری بڵاوبوونەوەی کۆلێرا سامان شێخ لەتیف ڕایگەیاند، تا ئێستا هیچ حاڵەتێکی کۆلێرا لە تاقیگەکانی سلێمانی دەستنیشان نەکراوە و دڵنیایی دا کە نەخۆشییەکە کۆلێرا نییە.
