یائیر لەپید وەزیری دەرەوەی ئیسرائیل، داوا لە هاوڵاتییانی وڵاتەكەی دەكات سەردانی توركیا نەكەن و باس لە ئەگەری هێرشی ئێران دەكات.
ئەمڕۆ دووشەممە یائیر لەپید وەزیری دەرەوەی ئیسرائیل، هۆشداری دا بە هاوڵاتییانی وڵاتەكەی نەچنە توركیا و ئەوانەشی لەو وڵاتەن، بە پەلە خاكی توركیا بەجێبهێڵن.
هۆشداریدانەكەی لەپید دوای ئەوە دێت كە ماوەیەكە حكومەتی ئیسرائیل و دەزگای ئاسایشی نەتەوەیی ئەو وڵاتە دەڵێن، ئێران بەنیازە هێرشبكاتەسەر هاوڵاتی و دامەزراوەكانی ئیسرائیل لە توركیا.
دوێنێ ڕۆژنامەی ئیسرائیل هەیوم-ی ئیسرائیل بڵاویكردەوە، هەواڵگریی توركیا تۆڕێكی سیخوڕیی ئێرانیی ئاشكراكردووە كە لە توركیا چالاكە و پلانی بە ئامانجگرتنی ئیسرائیلییەكانی داڕشتبوو.
بەپێی سەرچاوەكە، ئیسرائیلییەكان زانیارییان لەبارەی تۆڕە سیخوڕەكەوە بە توركیا داوە و مانگی ڕابردوو هەواڵگریی ئەو وڵاتە پلانەكەی پووچەڵكردووەتەوە.
